ජනාධිපති අනුර කුමාර දිසානායක මහතා හෙට (15) සිට ලබන 17 වැනිදා දක්වා ඉන්දියාවේ නිල සංචාරයක නිරතවෙයි.
ඒ ජනාධිපති ධුරයට පත්වීමෙන් පසු සිදුකරන පළමු විදෙස් සංචාරය ලෙසයි.
ඉන්දීය ජනාධිපති ද්රෞපදී මුර්මු මහත්මියගේ ආරාධනයකට අනුව ජනාධිපතිවරයා එම සංචාරයට එක්වෙයි.
ඒ අනුව එම සංචාරයේදී ජනාධිපතිවරයා ඉන්දීය ජනාධිපති ද්රෞපදී මුර්මු මහත්මිය සහ ඉන්දීය අග්රාමාත්ය නරේන්ද්ර මෝදි මහතා හමුවී ද්විපාර්ශවීක සාකච්ඡා පැවැත්වීමට නියමිතය.
එමෙන්ම ජනාධිපතිවරයා ඉන්දීය රජයේ තවත් ප්රබල අමාත්යවරු කිහිපදෙනෙකු සමඟ ද්විපාර්ශ්වික සාකච්ඡා පවත්වනු ඇත.
ජනාධිපතිවරයා සිය සංචාරය අතරතුර ඉන්දියාව සහ ශ්රී ලංකාව අතර ආයෝජන හා වාණිජ සබඳතා ප්රවර්ධනය කිරීමේ ව්යාපාරික වැඩසටහනකට ද නව දිල්ලි නුවරදී එක්වීමට නියමිත අතර බුද්ධ ගයාවේද සංචාරය කිරීමට නියමිතය.
ජනාධිපතිවරයාගේ ඉන්දීය සංචාරය පිළිබඳ නිවේදනයක් නිකුත් කරමින් ඉන්දීය විදේශ කටයුතු අමාත්යාංශය පවසන්නේ අගමැති මෝදිගේ දැක්මට අනුව ඉන්දීය සාගර කලාපයේ සමීපතම අසල්වැසියා ලෙස ශ්රී ලංකාව ප්රමුඛත්වයක් හිමිවන බවය.
එසේම ජනාධිපතිවරයා සමඟ මුදල් සහ ක්රමසම්පාදන නියෝජ්ය අමාත්ය හර්ෂණ සූරියප්පෙරුම මහතා සහ විදේශ රැකියා සහ සංචාරක අමාත්ය විජිත හේරත් මහතාද සංචාරයට එක්වීමට නියමිතයි.
