රතු කැකුළු සහල් ඉන්දියාවේ නොතිබීම නිසා ඉන්දියාවෙන් රතු සහල් ආනයනය කිරීමේ උත්සාහය අසාර්ථක වූ බව වෙළඳ, වාණිජ, ආහාර සුරක්ෂිතතා සහ සමුපකාර සංවර්ධන අමාත්‍ය වසන්ත සමරසිංහ මහතා පවසයි.
දේශීය වෙළෙඳපොළේ පවතින හිඟය පියවා ගැනීම සඳහා රතු කැකුළු සහල් ආනයනය කිරීමට ඉන්දීය මහ කොමසාරිස් කාර්යාලය සහ ඉන්දීය සැපයුම්කරුවන් සමඟ රජය සාකච්ඡා කළ නමුත් එම උත්සාහයන් අසාර්ථක වූ බව ඔහු පාර්ලිමේන්තුවට පැවසීය.
මෙරට මෝල්වලද රතු සහල් නොමැති බව පැවසූ අමාත්‍යවරයා කෙසේ හෝ තත්ත්වය කළමනාකරණය කර ගැනීමට උත්සාහ කරන බවද සදහන් කලේය.
ජනාධිපතිවරණයට පෙර පසුගිය රජය විසින් රතු සහල් නොමිලේ බෙදා හැරීම නිසා හිඟය උග්‍ර වූ බවත් බියර් කර්මාන්තයට, කුකුළු ගොවිපළවලට, විසිතුරු මත්ස්‍ය කර්මාන්තයට මෙන්ම සහල් පිටිවලටද සහල් භාවිත කරන බවත් ඔහු පෙන්වා දුන්නේය.
