ප්‍රමිතියෙන් තොර ප්‍රතිදේහ එන්නත් මෙරටට ආනයනය කර රෝගී ජීවිත අනතුරට පත්කිරීමේ සිද්ධිය සම්බන්ධයෙන් රක්ෂිත බන්ධනාගාරගත කර සිටින එම එන්නත් ගෙන්වූ සමාගමේ හිමිකරු වන සුදත් ජානක ප්‍රනාන්දු නමැත්තා ජනවාරි මස 15 වැනිදා දක්වා බන්ධනාගාරය මගින් ප්‍රතිකාර සඳහා අංගොඩ මානසික සෞඛ්‍ය විද්‍යායතනය වෙත යොමුකරන ලෙස මාලිගාකන්ද අතිරේක මහෙස්ත්‍රාත් නදීරා කුමාරි බෝගහදෙණිය ඊයේ (01) නියෝග කළාය.
සැකකරු ඊයේ අධිකරණයට ඉදිරිපත් කර නොතිබුණු අතර සැකකරු සම්බන්ධයෙන් අංගොඩ මානසික සෞඛ්‍ය විද්‍යායතනය විසින් ඉදිරිපත් කරන ලද වෛද්‍ය වාර්තාවක් බන්ධනාගාරය මගින් අධිකරණය වෙත ඉදිරිපත් කර තිබිණි.
එය සළකා බැලූ අතිරේක මහෙස්ත්‍රාත්වරිය තවදුරටත් මානසික ප්‍රතිකාර සඳහා සැකකරු අංගොඩ මානසික රෝග විද්‍යායතනය වෙත යොමුකරන ලෙස බන්ධනාගාරයට නියෝග කළාය.
