සමගි ජන බලවේගයේ වෘත්තීය සමිති නායකයෙකු වන ආනන්ද පාලිත මහතා විසින් සිදුකර ඇති ප්‍රකාශයක් හේතුවෙන් සිය කීර්තිනාමයට හානි සිදුවූ බව පවසමින් රුපියල් මිලියන 500ක එන්තරවාසියක් යොමු කිරීමට ලංකා ඛනිජ තෙල් සංස්ථාවේ සභාපති, ඩී ජේ රාජකරුණා මහතා පියවර ගෙන ඇති බව වාර්තා වනවා.
හිතාමතා, සැලසුම් සහගතව කරන ලද අසත්‍ය සහ ද්වේශසගහගත ප්‍රචාරයන් සම්බන්ධයෙන් මෙලෙස වන්දි ඉල්ලා සභාපතිවරයා විසින් පසුගිය දෙසැම්බර් මස 24 වැනි දින නීතිඥ සම්පත් යාලේවත්ත මඟින් යවා ඇති බව සඳහන්.
ලංකා ඛනිජ තෙල් නීතිගත සංස්ථාවේ සභාපති ලෙස වගකීම් දැරීම සම්බන්ධයෙන් පසුගිය 2024 දෙසැම්බර් මස 13 වැනි දින හෝ ඊට ආසන්න දිනයක දී ආනන්ද පාලිත විසින් අසත්‍ය සහ ද්වේෂසහගත ප්‍රකාශයක් තමන්ට එරෙහිව සිදුකර ඇතැයි ලංකා ඛණිජ තෙල් සංස්ථාවේ සභාපති, ඩී. ජේ රාජකරුණා තම නීතිඥයන් මඟින් අවධාරණය කර තිබෙනවා.
ඛනිජ තෙල් නීතිගත සංස්ථාවේ මීට පෙර සිටි සභාපතිවරයා ලබාගත් වැටුප මෙන් දෙගුණයක වැටුපක් ලබා ගන්නා බව සහ එම සංස්ථාව යටතේම අධ්‍යක්‍ෂ මණ්ඩල දීමනා දෙකක් ලබා ගන්නා බව මෙන්ම ඉතා නාස්තිකාර ආකාරයෙන් මුදල් වියදම් කරන බවට වන අසත්‍ය ප්‍රකාශ ආනන්ද පාලිත සිදුකර ඇති බවටයි එම එන්තරවාසියෙන් පෙන්වා දී ඇත්තේ.
දෙසැම්බර් මස 13 වැනි දින හෝ ඊට ආසන්න දිනයක දී ආනන්ද පාලිත මහතා විසින් සිදු කළ ප්‍රකාශය ප්‍රධාන ධාරාවේ සියලුම විද්‍යුත් මාධ්‍යවල ප්‍රවෘත්ති විකාශනවල දී ප්‍රචාරයකර තිබූ බවත්, මුද්‍රිත මාධ්‍ය පුවත්පත්වල ද වාර්තාකර තිබූ බවත්, එම වාර්තා නැවත රූපවාහිනී නාළිකාවල පුවත්පත් කියැවීමේ වැඩසටහන්වල දී ද ප්‍රචාරය කරන ලද බවත්, සමාජ මාධ්‍ය ජාලා විසින්ද වැඩි වැඩියෙන් ප්‍රචාරය කර ඇති බවත් එන්තරවාසියේ දක්වා තිබෙනවා.
මේ මඟින් තමන්ගේ කීර්තිනාමයට හානිවීම සහ ලංකා ඛනිජ තෙල් නීතිගත සංස්ථාවේ සභාපති ලෙස අවමානයට, අපවාදයට, ලැජ්ජාවට සහ සමච්චලයට ලක් කිරීම ඇතුළු සිදුකරන ලද හානි සම්බන්ධයෙන් රුපියල් මිලියන 500ක වන්දියක් ලබා දෙන ලෙස සභාපතිවරයා නීතිඥයන් මාර්ගයෙන් ඉල්ලා ඇති බවයි වාර්තා වන්නේ.
එම එන්තරවාසිය නිකුත් කර දෙසැම්බර් මස 24 වැනි දින සිට දින 14ක් ඇතුළත වන්දි මුදල ගෙවීමට අපොහොසත් වුවහොත්, අධිකරණය ඉදිරියේ නඩු පවරා ඉදිරි ක්‍රියාමාර්ග වෙනුවෙන් කටයුතු කරන බවත් අවධාරණය කර ඇති බවද වැඩිදුරටත් සඳහන්.
